باتريك كرم إستفاق من غيبوبته في عيد السيدة … “البطل أقوى من إنفجار المرفأ”
“أنا بشهد إنو أعجوبة إلهيّة خلّصتك. بشهد إنو الربّ بعتلك مين ينقذك، ويركض فيك ع الطوارئ، وإنك وصلت ع المستشفى ع آخر نفس.
أنا بشهد إنو حكيم السما هوي اللي شفاك…
أنا بشهد إنك بطل وجبّار…
أنا بشهد إنك بتحبّني وبتحبّ عيلتك وأصحابك لأنو قلبك قويّ وما ضعف رغم الوجع…
أنا بشهد إنو اللي مرقت فيه ما في حدا بيتحمّلو بالأخصّ إنك كنت حدّ الانفجار…
أنا بشهد إنو نيّتك طيّبة وإيمانك بالربّ كبير وما تخلّى عنك وإنو خلّيت اللي بيعرفك واللي ما بيعرفك يصلّيلك ويضوّيلك شمعة.
أنا بشهد إنّو اللي إيمانو بالربّ كبير الله ما بيتركو!
والأهمّ أنا بشهد إنو اليوم عيد السيّدة وأمّك العدرا ما تركتك وقوّمتلنا ياك بالسلامة والخطر راح وبقي القليل، وعيت، وصرت أحسن شوي!
نيّالنا العدرا والربّ معنا وما تركوك وإن شاء الله كل يوم رح تتحسّن يا حبيبي”.
بهذه الكلمات زفت خطيبة الجندي في الجيش اللبناني باتريك كرم الذي تعرّض لإصابات بليغة في انفجار بيروت خبر إستفاقته من غيبوبته في عيد انتقال مريم العذراء إلى السماء.
