أجمل الأماكن المجانية للتسلية ببيروت
بما إنو تعتبر بيروت من المدن الغالية بالعالم وكل فشخة فيها مكلفة لذلك في بعض الأماكن ببيروت فينا نزورها ونستمتع فيها مجاناً، ومن أبرزها:
١. حرش بيروت:
أجمل مساحة خضرا ممكن نشوفها ببيروت هي حرش بيروت الموجود بمنطقة قصقص، بغطي كل هالمساحة الكبيرة عدد كبير من النباتات والأشجار الغريبة والنادرة، بزوروا يومياً عشاق المشي والركض واليوغا والرياضة بشكل عام. الحرش بيفتح من ال-٧ – ٢ أيام الاسبوع ومن ال-٧ – ٧ بنهاية الاسبوع.
٢. آثار وسط مدينة بيروت:
ما في أحلى من الكزدورة بوسط بيروت بساحة النجمة وأسواق بيروت ومشاهدة آثار هالمدينة الرائعة وأبرزها الأعمدة الأربعة، الأعمدة المنحوتة، الأكسيدر الروماني والحمامات الرومانية.
٣. حديقة السيوفي:
حديقة السيوفي موجودة بمنطقة الأشرفية، ومساحتها الكبيرة بتناسب محبي رياضة المشي والركض، وهالحديقة هي عبارة عن غابة مصغرة فيها ألعاب للأطفال ومجموعة كبيرة من الأشجار والنباتات المتنوعة.
٤. الكورنيش البحري لمدينة بيروت:
من عين المريسة مروراً بالمنارة والروشة لنوصل عالرملة البيضاء، هالكورنيش البحري يلي يعتبر من أكثر الأماكن المقصودة من السياح وصيادي السمك ومحبي الرياضة الصباحية أو المسائية، وبيحتوي على عدد كبير من المقاهي.
٥. حديقة جبران خليل جبران:
هالحديقة موجودة بوسط بيروت وفيها نافورة مياه وتمثال لجبران خليل جبران بالإضافة لمنحوتات بتعود لفنانين اللبنانيين.
٦. قصر سرسق:
هالقصر موجود بشارع سرسق ببيروت وبيتألف من طابقين حوله حديقة كبيرة ويمكن زيارة القصر مجاناً.
٧. الزيتونة باي:
بتتميز الزيتونة باي بوجود عدد كبير من المطاعم بالإضافة لموقعها المميز يلي بيجذب عدد كبير من السياح يلي بيقصدوها ليستمتعوا بالمشي بالليل أو بالنهار بين اليخوت الممتدة على طول المارينا.
٨. حديقة الصنائع:
هالحديقة بتتمتع بشعبية كبيرة من الكبار والصغار بسبب مساحتها الكبيرة ولأن بتحتوي على عدد كبير من المقاعد الموزعة بكل مكان بجانب الشجر المتنوع والمعمر بالإضافة لوجود الألعاب يلي بتجذب الولاد.
بيروت.كوم
