جو رعيدي: دوركن تقاومو بالورقة يلي رح تحطووا بالصندوق نهار الاحد

عقد المرشح على لائحة القوات اللبنانية في دائرة كسروان جبيل جو رعيدي مؤتمرا جاء فيه:

مسا الخير
اذا خليتوا خير لنمسي فيه
حبيت احكيكن قبل يومين من الانتخابات لان هيدي اخر فرصة انو اقدر شارك معكن يلي عم يصير ويلي عم نشوفو بهل وقت

للاسف، بعد لليوم في ناس بتقلك صوتي لا بقدم ولا بأخر، وناس ماشية ورا الزعيم بدون تفكير وناس برأيا الورقة البيضا او اللوايح يلي ما الا حظ تجيب حاصل ممكن تكون هي الحل،

وبيجيك من تاني ميلة، كم عنتر بيعمل مراجل بمناطقنا وبهددنا وبيتوعدنا، فكرو رح نتخبا أو نهرب  بالبيجاما متل غيرنا،
لهيك شكلها البوصلة ضايعة عندن، فخلينا نصوبها، لأن أولوياتنا لازم تكون موجهة بشكل قاطع ضد يلي مهيمن عالدولة وخاطف القرار، ضد يلي معطّل وظايف الحكم والادارة العامة وضد يلي ما خلوون وراحو تحالفو معن، كرمال هيك بقلكن انو مبلى صوتكن هو كل الفرق وخيار اليوم هو خطين او ضد حزب الله ومنطق الدويلة او مع منطق الدولة،
هلقد القصة هينة.

معركتنا اليوم معركة وجود ومصير شعب ومعركة وطن ضد  هيدي المنظومة الفاسدة يلي بتستقوي بسلاح غير شرعي وفكرا تلغينا وتفرض علينا ثقافتها وتخلفا وتعصبا يلي ما بيشبه الا الدويلة تبعها، كرمال هيك واجبنا نصوت ونعلي الصوت لان جريمة اذا ما صوتنا وجريمة اكبر اذا صوتنالون او صوتنا بمطرح غلط،
حطو صوتكن بالمطرح المناسب،

ما تنتخبو ليستا ما الا حظ لان بتكونو عم تكبو صوتكن بالزبالة،
ما تنتخبو الشخص يلي زفتلكن الطريق او دفع عنكن مستشفى، هيدي ابسط حقوقكن من الدولة لو في دولة،
انتخبوا جيل جديد، انتخبوا مشروع واضح، انتخبوا يلي هدفه بناء دولة.
الثورة الحقيقية اليوم هي ب ١٥ ايار مش ب ١٧ تشرين، كرمال هيك فيني اسأل شو بعدنا ناطرين؟
لازم ندق جراس الكنايس لنحس بالخطر يلي عم نعيشو ويلي ناطرنا لنتحرك؟

يا اهلي بكسروان وبكل لبنان بدي اسألكن، انتو ما جعتو؟ انتو ما انذليتو؟ مين لوصلكن لهون؟

التيار الوطني الحر وحلفاؤو وولاية الفقيه يلي حاميتن، هني يلي هدمو اخر مداميك بالدولة وأفلسو البلد وهجرو ولادنا وجايين اليوم يهيمنو عقراراتكن بشعارات ووعود لا طعمتنا خبز من قبل ولا رح تطعمينا هلق؟
صدقوني، لا نحنا ولا انتو بعد عنا شي نخسرو أو نخاف عليه الا ولادنا،
هيدي منا بس انتخابات، لا والف لا، هيدي معركة مصيرية وجودية بتتوقف عند كل ورقة بصندوق الاقتراع
يا اما بيبقى لبنان يلي بيشبه حضارتنا وثقافتنا ومنعيش فيه أو منصير علنا دولة ايرانية وولاية فارسية وبلشنا نشوف وجها الحضاري عا طريق المطار وبمعارض الكتب ووهيدا كلو للاسف عا اطلال الجمهورية اللبنانية
بس لأ ما حزرتو يا اخوان نحنا ما منأمن الا بشفاعة مار مخايل والاتفاق تبعكن صار بدو ماي مصلاية لانو اتفاق شيطاني بركي بترجعو لحضن الوطن حاج قاعدين بحضن الفرس وعم تبوسو ايدين
هيدي فرصتنا الأخيرة وفرصة لكل شخص بعدو مِتردد ومش عارف لمين لازم يعطي ثقتو،
بفهمكن انكن وثقتو فيون من قبل وحمد الله وصلنا عجهنم بس عل قليلة وعد ووفي ،
مشكور والله…

كونو اكيدين انو سوا منسترجع لبنان العزة والكرامة، لبنان البلد مش لبنان الدويلة،
نحنا بحرب مفتوحة، وما عنا خيار الا نخوضها للاخر ونربحها لان مشروع هالمنظومة هو عكس مشروعنا،
مشروعنا يلي هو مستقبل هالوطن.

آن الآوان لنستعيد هيبة لبنان ودورو بهالشرق،
آن الآوان الاصبع يلي بينرفع بوجنا يصير عم يبصم بالعشرة لبناء الدولة، لانو هي الأصابع بالذات هيي لي دمرت هويتنا ونسفت كيانا وكل يومين بتنطلنا حتى تربحنا جميلة انو هيي لحاميتنا، يا خيي، مين طالب حمايتكن أو بدو غطا عبايتكن؟ هتموا بحالكن وما عليكن منا، لا رفعة أصبعكن بتخوفنا ولا ضحكة الحاميكن هو وأزلامو بتهمنا باي شكل من الاشكال.

وقبل ما انسى، دخلكن نحنا مش بكسروان وعنا خيرة نواب الممانعة وشخصيات الموارنة وحماة بكركي، يا أوادم لا أيمتى ناويين تضلو نايمين أو مبنجين ويضل الشعب ماشي وراكن عالعمياني موعود بزفت هون أو قسط مدرسة من هونيك.
اتهمو نسوانا بالدعارة وسرماية نسوانا بتشرف راسون، قالوا عن مناطقنا للتعري والمخدرات، فشرو نحنا مناطقنا مزنرا من يسوع الملك وسيدة حريصا ومار شربل، ومرق عليا كتير من قبلون، كلون نكسرو وفلو وبقيت كسروان وجبيل بلاد فخر وادب وكرامة وعنفوان. بس شكلكون قابضين حقا والكرامة عندكن سعرا صار رخيص حتى ما سمعنا حسكن.
وبزيد بخصوص هالتوقيفات العشوائية يلي ما عم  بطال الا فئة وحدة وينكن من هالاستنسابية بالتعاطي؟ بدكن قولا من الآخر مش شاطرين الا على المسيحية؟ ليش لأن المسيحية بعدون مأمنين ببناء دولة وبعدون محترمين لبقي من هيبتا، هيدا شي اكيد لان ما بعمرنا كنا مكسر عصا او ضعاف، بالعكس نحنا الوحيدين يلي بعدنا مؤمنين بالدولة ويمكن نحنا الوحيدين يلي بعدنا
مندفع ضرايب ومنلتزم بالقانون.

بس شو بدي قلكن ب ١٦ الشهر بيصير الضرب بالميت حرام، والندم ما بيعود ينفع،
صوتكن هو الخلاص الوحيد، خلصوا أنفسكن من هالذل يلي ما شفناه الا بعهد بي الكل وسيد الدويلة، حطو ايدكن بإيدنا حتى نعمر هالبلد، لان غير هيك ما في خلاص.
يا أهلي بكسروان، بعد في يومين، يا منقلب الطاولة ع رووسن، يا بدن يانا نروح نقعد ببيوتنا ونتفرج علين عم يفوتو عنص دارنا، يهينونا ويسبونا ويهددونا ويدقو بشرف نسوانا وكرامتنا، بس فشرو ايه فشروا نترك هل الارض ونتركن يسرحو ويمرحو عا ذوقن
يا كسروانية صار الوقت تقلبو هالطاولة عحلفائن قبلن، وتخلون يعرفو حجمن وانو ايامن ولت بلا رجعة لان الشعب قرف مننن ومن طمعن وخضوعن وركضن ورا الكرسي،
نحنا مش شعب ذمي ولا رح نكون ولا شعب خاضع كرمال كم صوت ولا منخاف من الوعيد والتهديد متلن ولو قد ما جربو يخوفونا ويفتعلوا مشاكل وأحداث امنية رح نكون بالمرصاد بكل لبنان ورح ننتخب لو شو ما كان الثمن

واذا بدكن تضلا كسروان عاصية متل ما عرفتوها، هيدي آخر خرطوشة، انتخبوا الناس العاصيين، انتخبو صح، انتخبو لايحة القوات اللبنانية وخلو صوتكن التفضيلي للناس يلي بتستحق توصل، بس عشرط توصل بشرف وكرامة ومحبة الناس مش بشراية الاصوات من تحت الطاولة.

وعفكرة، هودي مصرياتكن يلي سرقوها،
هودى جنا عمركن، حق ولادكن، ورتة بياتكن
هودي لازم يردوون بالقانون لو  تركولنا دولة ونظام، لازم يكونو كلن بالحبوسي وواقفين عم يتحاسبو قدامكن، مش عم يعملو عليكن زعما وبكوات

قبضو منن وغلو السعر، بس بالاخر روحو صوتو ضميركن.

سوا رح نكفي المعركة وخلاص لبنان بإيدكن، لبنان
دوله حرة غصباً عنن وماضينا وحاضرنا بيشهد
من هون مش فالين، هون باقيين ويلي مش عاجبو هو يفل وبواب السفارات ما في اكثر منها، وهني معودين عالهريبة عالسفارات.

بالنهاية، جدودنا قاومو واستشهدو كرمال كرامة لبنان، بياتنا حاربو كرمال طريق القدس ما تمرق بجونيه، واليوم دوركن انتو تواجهو مشروع تغيير وجه لبنان،
دوركن تقاومو بالورقة يلي رح تحطووا بالصندوق نهار الاحد،
اوعا تحطو ورقة بيضا لان الابيض هالمرة علامة استسلام،
جدودنا كتبو تاريخنا بالدم ومش بالصدفة لايحتنا لونا احمر ،
لان نحنا ولا مرا نسينا تاريخنا وولا مرا ما احترمنا تضحيات يلي سبقونا،
نهار الاحد خلو ورقتكن حمرا وخلو صوتكن عالي .