ايوب من مطرانية صيدا الكاثوليكية: اليوم اجا وقت نوقّف النزيف

أطلقت المرشحة المستقلة عن المقعد الكاثوليكي في قضاء جزين والمدعومة من القوات اللبنانية، الدكتورة غادة أيوب، حملتها الانتخابية من مطرانية صيدا الكاثوليكية، يوم الأحد 13 اذار، في حضور راعي أبرشية صيدا ودير القمر لطائفة الروم الملكيين الكاثوليك المطران ايلي بشارة الحداد وفريق عمل الحملة.

وألقت أيوب كلمة قالت فيها:

“قراري بالترشّح اخدتو لأنو الجوع ما عاد كلمة، صار واقع.
ولانو الإنهيار صار حقيقة ملموسة عند كل عيلة وبكل بيت.
صحيح الوضع اليوم مأساوي، بس الأمل موجود. والأمل عنوانو 15 ايار.
الهدف من ترشّحي تنعطي الناس فرصة حقيقية للتغيير، ونطرح قدّامن مشروع جدّي للإنقاذ أساسو استرجاع الجمهورية القوية وحكم القانون.

الترشّح هويّ حتى البكرا يكون مختلف عن الحاضر.
حتى الشباب يرجعلن الأمل، وما تضلّ الفيزا هيي كل الأمل.
مش مزبوط انّو الإنتخابات ما رح تغيّر شي، أكيد رح تغيّر، ونحنا ثابتين حتى نغيّر.
الأنتخابات هالمرة هي مصيرية، هي اكتر من استحقاق سياسي موعدو كل 4 سنين، اكتر من عمليّة اقتراع.
مَنّا اختيار بين مرشّح ومرشّح تاني . هالمرّة هيي اختيار بين لبنان اللي منعرفو وبين لبنان تاني. لبنان الحرّ السيّد، لبنان الدولة والمؤسسات …. او لبنان المخطوف التابع الخاضع، لبنان اللا دولة واللاعدالة.
او بيكون لبنان حرّ سيّد … او ما في لبنان.

ونحنا ثابتين تينهض لبنان.
اليوم اجا وقت نوقّف النزيف، ونقول هيدا اسود وهيدا ابيض. ما في بقا محل للمواقف الرمادية.
اجا الوقت نمنع تغيير الهويّة اللبنانية.
نمنع سقوط الجمهورية.
ترشحت حتى نبقى ثابتين بهالأرض وبرسالتنا.
متل ما اهلنا بقيوا ثابتين بأرضن رغم كل اللي صار وكل اللي مرق، نحنا اليوم مع أهلنا واخوتنا بصيدا وجزين ثابتين لنحافظ على العيش المشترك وعلى الهوية اللبنانية.
نحنا مزروعين بهالأرض، ثابتين، ما منخاف وما منقبل نكون اهل ذمّة، وما منقبل يصادرولنا قرارنا ولا يلغونا، وما منقبل يكمّل الإنهيار .

هالانتخابات هي مصيرية، ولازم كلنا نكون ثابتين بخيار لبنان الدولة، لبنان السيادة والجمهورية القوية ونحنا اكيد ثابتين…”