النص الكامل للكلمة النارية خلال اعلان ترشيح الفرد رياشي
النص الكامل لكلمة اعلان ترشيح الفرد رياشي
لبنان عم بيلفظ أنفاسو الأخيرة والإنتخابات النيابية منا الخلاص، هي مجرد فرصة لنخللي جبهة الدفاع عن الكرامة والحرية من قلب مؤسسات الدولة تعزيزاً لصمود الشعب الحرّ لحدّيت ما ينتهي القدر يلي رامينا بتم التنين.
التعايش المشترك بالنظام المركزي هو تكاذب مشترك، هو ذريعة للتحكم بالناس والاستفراد بالحكم.. نحنا بلبنان شعب تعددي ع أساس هوياتنا الطوائفية، هوية المجتمع المسيحي اللبناني، وهوية المجتمع المسلم اللبناني، وقبل ما نعترف بخصوصياتنا وبحقنا بالتعددية على قدم المساواة مش رح نعيش بسلام.
بإسم التعددية وبإسم المساواة وبإسم الحرية وبإسم الكرامة والعدالة عم نطرح الفدرالية على أساس طوائفي- جغرافي، كرمال نخلص من فساد الدولة المركزية يلي فرضت علينا مية سنة من الحروب وعدم الإستقرار والإنهيار الإقتصادي مؤخراً.. وين الضرايب يلي عم بيدفعها المتن وين عم تنصرف وع أي مناطق؟!! المتن يلي هو قلب لبنان الحضاري شو دورو بصناعة رئيس الجمهورية شو دورو بتشكيل الحكومة وتسماية رئيسا شو دورو بانتخاب رئيس مجلس النواب.. كرمال تسقط منظومة الفساد والنظام يلي حاميا صار لازم ناخد قرارنا بإيدنا صار لازم قرار المتن يكون بقلب المتن وهيدا الشي ما رح يصير إلا بالفدرالية.
أكبر كارثة إنو نبقى عايشين بظل إتفاق الطائف ونضل نقبل بالكذبة يلي بتقول إنو ما تطبق ولازم نعطي فرصة، بينما المنطق بيقول إنو الاتفاق يلي ما بيتطبق بتلاتين سنة هو اتفاق فاشل… اتفاق الطائف يلي بيبشر بإلغاء الطائفية السياسة هو طرح شمولي إلغائي ليسمح للأكترية العددية إنو تتحكم برقاب الناس، إتفاق الطائف بيفتي باللامركزية الإدارية الموسعة يلي هي طرح فاضي من المضمون ما بيلغي الفساد بس بيستنسخو على عدد الأقضية طالما الخلل بالسلطة المركزية، نتيجة ضعف وتخاذل القوى السياسية كرمال تتجنب تحكي بالفدرالية وهي الحل الوحيد للمشكلة وبالعمق، اتفاق الطائف يلي سمح بتشريع الإحتلال السوري، واتفاق الطائف يلي سمح بتشريع سلاح حزب الله وخلى هل الحزب الإرهابي يتحكم بالدولة اللبنانية.
الحياد ضرورة للبنان، بس الحياد مستحيل بلا فدرالية وإلا الطوائف بدا تضل تستقوي بالخارج كرمال تعزيز نفوذها بالداخل. وأكيد الفدرالية بلبنان مستحيلة بلا حياد. ويلي معو سلاح ولاحق إيران ورافض الحياد بدو يختار بين الهوية اللبنانية وثقافة السلام وبين الهوية الإيرانية وثقافة الموت.
بيسموا حالون مقاومة وهني ما بحياتون كانو مقاومة بخدمة القضية اللبنانية لا قبل انسحاب إسرائيل ولا بعدا، مجرد فصيل عميل للحرس الثوري الإيراني. المقاومة الحقيقية الوحيدة يلي اشتغلت لمصلحة القضية اللبنانية هي المقاومة اللبنانية يلي ع راسا الرئيس الشهيد بشير الجميل والرئيس الراحل كميل شمعون وكل الشهدا يلي مشيو ع هل الدرب بمسيرة الكرامة. واذا بدا تكون انتخابات بدا نتنتخب ناس بتشبهون والا عمرا ما تكون.
وانا ماشي ع هل الطريق من سنة التسعين وقت وقفنا أنا وكتار من رفقاتي وحملنا السلاح وقاتلنا الاحتلال السوري بمؤازرة مغاوير الجيش اللبناني، وبقينا بأرض المعركة وما استسلمنا بس بوقتها غيرنا في ناس مفكرينون الناس كبار هربوا!!!
انا مترشح عل الانتخابات النيابية كرمال ترسيخ الطرح الفدرالي من جوات مجلس النواب المرتكز على مفهوم الحياد.
– كرمال نخلص من لعنة اتفاق الطائف ونحاول نبني نظام سياسي جديد للبنان الجديد يكرس الحرية والسلام.
– بحال استمر رفض النقاش بالطرح الفدرالي ورفض تسليم السلاح الشيعي المتمثل بسلاح حزب الله وحلفائه، عندها رح اطرح سن قانون التسلح ودعوة المسيحيين والطوايف الغير مسلحة لتنظيم قوة مسلحة مقابل وجود سلاح حزب الله.
– انا مترشح كرمال نطرح من قلب مجلس النواب حل وتسليم السلاح الفلسطيني والطلب من الجيش اللبناني بالتدخل.
– مترشح كرمال نطلب من اللاجئين السوريين مغادرة الاراضي اللبنانية فورا.
– كرمال محاسبة المسؤولين عن انفجار أربعة أب وتقديمهم للمحاكمة، وكرمال محاسبة يلي عم بيعرقل العدالة من الشيخ حسن نصرالله مجرم 7 ايار ببيروت لنبيه بري مجرم الطيونة لعماد عثمان فاسد قوى الأمن الداخلي لعباس ابراهيم مستبيح الأمن العام تحويلو لجهاز بخدمة العلاقات السياسية لحزب الله وأداة لديبلوماسيتو الدولية.
– عم اترشح كرمال استرجاع الاموال المنهوبة، وأول شي منبلش من رؤساء مجالس إدارة البنوك يلي هني مسؤولين بأموالن الخاصة عن اموال المودعين. وهيدا الشي بينص عليه القانون بس الكل متواطئ على خرقوا. ما بصير يضلو عم يتنعموا بثرواتون ونحنا عم ننذل ع أبواب البنوك!!
– عم بترشح كرمال طرح قانون لمنع بيع الاراضي بين الطوائف. وإلا قريباً رح تتغير الهوية العقارية لمناطقنا تحت وطئة المشاريه الممنهجة لشراء العقارات بمناطق معينة من قبل طوائف معينة.
– عم بترشح كرمال ضريبة المتن تبقى للمتن اكان من خلال سن قانون او من خلال طرح العصيان المدني.
– عم بترشح كرمال الغاء مفاعيل مرسوم التجنيس والمتن كتير تضرر من المجنسين يلي انفرضوا عليه وانفتحلون خانات نفوس جديدة بقلب ضيع المتن كرمال الاستنفاع بأصواتون الإنتخابية وكرمال تغيير هوية المتن اللبنانية… بوقتا كانت هل الخطة بضغط من سوريا وهلق تحولت لخدمة أزلام سوريا والناس يلي بتدفع مصاري كرمال تستورد باصات الناخبين!!
– انا عم اترشح كرمال تكريس تاريخ 26 نيسان أي تاريخ انسحاب جيش الاحتلال السوري كعيد وطني. وهيدي فضيحة انو خلصنا من الاحتلال السوري بس الكل فايت بالمسايرة السياسية وعم بيغض النظر انو تنرفع لوحة تخلد هل الذكرى على صخرة نهر الكلب متل كل الاحتلالات يلي اجت وفلت عن هل الارض وبقي لبنان هو الثابت!!
– انا عم اترشح كرمال المطالبة باسترجاع اسرى الجيش اللبناني يلي تم اسرهم من قبل جيش الاحتلال السوري سنة 1990، واسترجاع المفقودين وفي حال عدم الجواب ضمن مهلة زمنية محددة لازم الدولة بكل مؤسساتها تتكرس لرفع الدعاوى أمام القضاء المحلي وكل المحافل الدولية لاسترجاعون.. ما بيجوز انو الإمام موسى الصدر تتجند مؤسساة الدولة القضائية كرمال استرجاعو ومحاسبة المسؤولين عن هل الملف وكشف الحقيقة بينما في مفقودين تانيين ما حدا بيحكي فيون… وعدي الكون انو انا ما رح ساير ولا رح اقبل بصيف وشتي تحت سقف واحد
– انا عن بترشح كرمال نشتغل لعزل نبيه بري عن رئاسة مجلس النواب بسبب شبهات الفساد الكبرى المتورط فيها.
– انا عن اترشح كرمال طرد السفير التركي لحين ما تعترف دولتو بالمجازر الارمنية ومجزرة سيفو بحق اخواننا السريان والمجاعة يلي إبادة تلت سكان جبل لبنان، وتعتذر عن هل الابادات الجماعية وتباشر بدفع التعويضات عنا. وكمان من ناحية تاني السفير الإيراني ببيروت لازم ينطرد لأن تطاول على غبطة البطرك الراعي وغير انو كل فترة والتاني بيطلع مسؤول بالحرس الثوري الإيراني بيتبجح انو بيروت تحت السيطرة الإيرانية وما بيجوز يرجع ع لبنان الا ما يطلع يطلب الغفران من عتبة بكركي ومن عتبة القصر الجمهوري. والسفير السوري علي عبد الكريم علي لازم ينقبع من لبنان لأن حول السفارة السورية ببعبدا لقاعدة أمنية مخابرتية، وما بقا نرضى بسفير سوري عل الارض اللبنانية الا اذا بدو يلتزم بالأصول الديبلوماسية والا خلي يضل بقصر المهاجرين.
باسم الحرية والكرامة الانسانية، باسم الفدرالية والقضية اللبنانية، انا بستودع ترشيحي بضمير كل واحد فيكن.
يا أهل القضية اللبنانية،
العدوّ المتشح بالسواد صار خلف الأسوار
دقوا الأجراس يا منقاوم يا منموت،
وبإذن الرب النصر للحق والحرية والحقيقة النصر للقضية اللبنانية.
*الفرد الرياشي،*
*مرشح عن مقعد الروم*الكاثوليك، لائحة* *”متنيون سياديون”*
