بيروت – قصيدة زجل للملك موسى زغيب

يا بيروت يا نجمة كئيبه
يا طفلة روّعوكي تا تشيبي
يا مَلكِه تاجِك قبالِك تكسّر
وعا سجن الموت قادوكي غصيبه

ولما الشرق عن حقّك تأخر
افتديتي الشرق ودْفعتي ضريبه
وزْرعوكي شظايا ودَعس عسكر
محلّ الفكر وقْلام الكتيبه

كنتي للشرايع خير مصدر
وما بعرف ليش …من مدّة قريبه
ع حيطانك جنون الحرب سطّر
كِتابه عن تقاليدك غَريبه

يا ام الشرايع لو تغيّر
زمانِك وابتليتي بهالمصيبه
بتبقي لكل شَعرا الأرض منبر
ومهما الشِعر يضحكلو حبايب
بعد بيروت ما بدّو حبيبه

الملك الشاعر موسى زغيب